„ოსკარზე" ნომინირებულმა სცენარისტმა რენდოლ უოლასმა (Randall Wallace) გადაცემაში „Arroyo Grande" ისტორია გაიხსენა მელ გიბსონთან (Mel Gibson) საუბრის შესახებ, რომელიც 2004 წლის ბიბლიური დრამის — „ქრისტეს ვნების" (The Passion of the Christ) გაგრძელების შექმნას უკავშირდებოდა.
უოლასის თქმით, იდეა 2016 წელს გაუჩნდა, როდესაც ის და გიბსონი ფილმ „ჰაკსო რიჯის" (Hacksaw Ridge) პრომოუშენს აწარმოებდნენ. სცენარისტმა გიბსონს უთხრა, რომ აღდგომის ისტორია ის თემაა, რომელიც ნამდვილად უნდა გადაეღო. გიბსონმა პასუხამდე ხანგრძლივი პაუზა აიღო, შემდეგ კი უთხრა, რომ ამ ფილმის გადაღება არ შეიძლებოდა ფულისთვის ან იმ ადამიანებზე საპასუხოდ, ვინც მათ სძულდათ ან ვინც უსამართლოდ მოექცათ.
ამის შემდეგ, უოლასის მოგონებით, გიბსონმა დაამატა: „იცოდე, სატანა შენ მოგეპარება." სცენარისტმა ხუმრობით უპასუხა, რომ სატანას ბაპტისტები ნაკლებად აინტერესებს და კათოლიკეებზე უფრო ნადირობს. თუმცა მან აღიარა, რომ გიბსონის სიტყვებმა გულში ჩარჩა და ეს საუბარი „მადლის შესახებ ლამაზ დიალოგში" გადაიზარდა.
სწორედ ამ საუბრიდან დაიწყო ორი კინემატოგრაფისტის თანამშრომლობა სცენარზე. უოლასმა შესთავაზა გიბსონს, რომ პირველ ეტაპზე თავად დაწერდა პროექტს, შემდეგ ერთად გადაამუშავებდნენ. აღსანიშნავია, რომ წყვილი ერთად მუშაობდა ფილმებზე „მამაცი გული" (Braveheart, 1995), „ჩვენ ჯარისკაცები ვიყავით" (We Were Soldiers, 2002) და „ჰაკსო რიჯი" (Hacksaw Ridge, 2016).
პროექტის გამოსვლის თარიღები არაერთხელ შეიცვალა. „ქრისტეს აღდგომა: პირველი ნაწილი" თავდაპირველად 2026 წლის მარტში იყო დაგეგმილი, თუმცა პრემიერა 2027 წლის 6 მაისამდე გადაიდო. მეორე ნაწილის ჩვენება კი 2028 წლის 25 მაისისთვის იგეგმება, Variety-ს ინფორმაციით.
ფილმში იესოს როლს იააკო ოხტონენი (Jaakko Ohtonen) ასრულებს — მან ჯიმ კევიზელი (Jim Caviezel) ჩაანაცვლა, რომელიც 2004 წლის ფილმში იესოს განასახიერებდა. მსახიობთა გუნდში არიან: მარიელა გარიგა მარიამ მაგდალინელის როლში, პიერ ლუიჯი პაზინო — პეტრეს, კასია სმუტნიაკი — მარიამის, რიკარდო სკამარჩო — პონტიო პილატეს, ხოლო რუპერტ ევერეტი — ერთ-ერთ მეორეხარისხოვან როლში.
წყაროს ცნობით, მსახიობთა სრული შეცვლა განპირობებული იყო პრაქტიკული მიზეზით: წინა მსახიობებისთვის ასაკის ციფრული შემცირება და სხვა სპეცეფექტები ძალიან ძვირი დაჯდებოდა.
